Iha meadu pandémia COVID-19 globál, UNFPA kontinua hala'o papél krítiku ida durante emerjénsia sira. Iha tinan 2021 nia klaran, inundasaun pior liu iha tinan 40 nia laran kona Timor-Leste. Nasoins Unidas servisu hamutuk ho Governu Timor-Leste koordena resposta emerjénsia ida no asesu ba nesesidade sira ba vítima sira hosi inundasaun– maioria feto no labarik sira. UNFPA asegura katak nesesidade no direitu sira hosi ema sira ne'ebé vulnerável liu -- liuliu feto sira, inan isin-rua sira no labarik-feto adolexente sira iha situasaun emerjénsia sira hetan atendimentu no respeitu. UNFPA fasilita distribuisaun sasán ijiene no sanitáriu sira hanesan pakote ida ne'ebé koñesidu hó ‘Dignity Kits’ no pakote maternidade hó kolaborasaun ho Ministériu Saúde.

UNFPA mós kolabora ho autoridade sira hodi asegura prestasaun servisus esensiál sira ba feto isin-rua sira -- fornese klínika maternidade móvel sira no materiál báziku sira hanesan pakote maternidade nian ba inan isin-rua sira iha situasaun emerjénsia.

UNFPA iha kolaborasaun ho Governu Timor-Leste hodi hametin kapasidade traballadór saúde sira nian hodi sustenta no aproveita progresu no rezultadu sira ne’ebé hetan ona iha dezenvolvimentu umanu no harii instituisaun sira iha tinan hirak nia laran. Nota mós katak, kapasidade ne'ebé la sufisiente sai nafatin dezafiu boot ida iha tempu badak/médiu prazu.